UGC-NET HI A NEP E....!!!

UGC-NET hi tunlai kan lehkhathiamte zinga thil pawimawh leh ri zing ber a ni awm e.IAS ni tur chuan Prelim, Main leh Interview paltlang a ngai a.Chutiang bawkin Lecturer ni tur chuan Post Graduate Degree leh NET neih hi a ngai a ni.NET hi a pawimawh a, thil hote anga lang, pass har tak si a ni.Exam beitu te an tam ang huin a pass te erawh chu a tam lo hle thin.Hman deuh khan Lungleia College Principal pakhat chuan NET chu MA exam aia nep angin a sawi a,amaherawh chu chutianga thil nep ni si chuan kan thalai rual hian an pass theih miah loh aw tiin ka ngaihtuah a.College leh University examah chuan a chhang sei sei khan mark an hmu tha ni maiin a hriat a, NET erawh a dan a dang a, thiam tak si, tawi fel tak leh kim tak si a chhan a ngai a,hei tak hi mi tam tak thiam lohna chu a ni.

NET hi pass a har a, a har avang tak hian mi tam takin M.Phil leh Ph.D an zir zawm ta thin a, hei hi a chhan chu mi tam takah ni vek lo mahse, M.Phil leh Ph.D hi zir tluan chuan a pass mai theih a,competitive a nih loh vang a ni.India ram ah hian Ph.D zirna hi za dawn a awm a, henga Ph.D degree kan neih chuan NET kha min awl ta thin a,chuvangin Ph.D degree nei thiam pangai ve tho tan chuan Lecturer a luh hi a awl ta bik ta em em ni.

Kan rama college Lecturer tur lak thuah pawh NET leh Ph.D degree nei chu an tha ber ang a.NET neiin an daih lo a nih chuan a nei lo pawh la ta ila, mahse heng ho hi contract basis in chhawr ta ila,kum hnih chhunga NET an pass loh chuan an service tih tawp sak ni ta se a tha phian thei bawk ang.NET nei nazawng hi an thiam vek chuang lo a,NET pass leh pass loh pawh hi vanduai leh vanneih thil te pawh a i ve tho a ni.NET nei lo zingah pawh teaching thiam tak tak an tam ang,NET nei aia hman tlak zawk te pawh an awm ang.Amaherawh chu UGC duh dana NET nei kher lak tur tih hi chu ti thei ila a tha hle ang.Chuvangin NET hi a nep ka ti lo a, kei chuan NET neih hi nuam ti ka veng veng zawk a ni.

V. Lalengmawia
Champhai Vengthlang

(Published in Vanglaini in the month of July)