CIVIL SERVICE EXAM LEH THALAITE

Civil Services Exam hi Union Public Service Commission in kum tin May thla ah a buatsaih thin a, he exam hi khawvela exam beitu tamna ber pawl a ni awm e.Hman deuh khan hmarchhak tlangmi te zingah Mizo te hi hetiang lamah hian kan tam ber thin.Amaherawh chu hun a lo kal zel a, hnam dangte pawh an lo fing zel a, tunah phei chuan Mizo thalaite Civil Service lamah kan lang tam tawh lo hle.Hei hi a chhan ni awm a lang chu thalaite ruihtheih thil kan in hman nasat luat vangte, chhungkaw harsarna vangte leh thatchhiat vangte a ni thei ang.Amaherawh chu kawng a tawp mai lova, kan taimak phawt chuan he Central Service ah hian ‘chance’ tha tak kan la nei a ni tih hria ila, kan ram leh hnam tan kan ke i pen chhuak ang u.


Civil Service hi All India Service leh Central Service-ah te then hran a ni a, a lar zual te chu heng IAS,IFS,IA&AS,IRS,IPS,ICAS,ITS,IDAS,IDES,leh a dangte an ni.He Exam bei thei tur chuan graduate nih a ngai a, a awmzia chu a chhe berah BA pass a ngai a nih chu.First Division a ni emaw, third Division a ni emaw, tu pawhin an bei thei a ni.Keini Mizo leh tribal dang tan chuan kum 35 thleng a exam theih a ni.Aizawlah pawh Preliminary Exam hi chu a exam ve theih a ni.


Awle, he exam kalhmang hi lo ngaihtuah rawh le.A hmasa berin i subject tui zawng kha lo ngaihtuah la, subject chi hrang hrang a awm a, mahni tuina ber subject kha exam mai tur a ni.Arts,Sciences,Commerce,Medical leh Engineering subjects hrang hrang a awm a ni.Tichuan, he exama thil hmasa ber chu Preliminary Exams a ni a, hetah hian i subject duh thlan pakhat leh General Studies paper i exam a ngai a ni.Preliminary Exam a zawhna te hi objective type vek a ni a, a dik ber ni awm a kan rinah pencilin kan thai dum mai dawn a ni.General Studies paper hi exam beitu zawng zawng tan a ni a, zawhna 150 a awm thin a ni.Mahni subject thlan kha optional subject an ti a, chu chuan zawhna 120 a nei thung.Preliminary Exam beitu hi kum tin mi nuai hnih aiin an tam thin bawk a, Preliminary Exam pass te erawh chu sang hnih emaw sang thum vel chauh an ni thin.


Preliminary Exam a hlawhtlingte chuan October thlah Main Exam an nei leh thin a, Main Examah erawh chuan exam beituin optional subject pahnih a thlan bakah General Studies, essay paper leh English paper a nei tawh dawn a ni.Main Examah hian English leh Essay paper tih loh chuan subject tinin paper pahnih an nei tawh a ni.Entirnan, Preliminary Examah History lo thlang ta ila, Main Examah erawh chuan History bakah subject dang pakhat ka thlan a tul ta a ni.Tichuan subject pahnih leh General Studies ka nei dawn ta a ni.English paper hi fail theih loh tluk a ni a, a chhan chu exam beitu khan english tlem a zawng a lo hriat kha UPSC duh dan ber a ni a, chuvangin English paper-a kan mark hmuh hi belh tel a ni ve lo a ni.

Main Exam result hi a kum leh March thlaah a chhuak thin a, heta tling te hian Interview an hma chhawn thin a, Interview a tlingte chu an service duh a zirin hna pek an ni ta thin a ni.


Civil Service bei tur chuan thiam ringawt a tawk lova, taimakna te, rinawmna te,mahni inrintawkna te leh beih hram hram peihna te hi a pawimawh a ni.Chuvangin thil dang nena kal pah mai mai chi a ni lova,a lo berah kum khat tal in puahchah a ngai a ni.Tunlaiin thalaite kan thluakte a tha a, in elna pawh a sang zel a, Matric pass hnu kum nga vel peih tak leh taima tak a zir chuan kan hlawhtlin ngei ka ring tlat a ni.Chuvangin kan hnam zahpui awma a awm loh na turin tun atang hian zirlai ten tum mumal tak Civil Service lam kher lo pawh nei ila, Computer Games, Play station leh Video Games lam ai chuan kan hriatna lama min pui tu tur lehkhabu tha tak tak chhiar i ching zawk ang u.


A tawp ber ah chuan lalna te, ropuina te, mi zah nih te, zahawmna te,pawimawhnate neih i duh chuan taima takin han zir la, IAS emaw Central Service dang emaw tal chu nih ngei i tum tur a ni.Amaherawh chu taimakna leh tumruhna i neih a ngai thung ang a,chumi hnuah chuan hlawhtlinna chu i la um pha ngei ang.


Magazine rawn tlak te: Civil Service Chronicles, Competition Wizard, Chanakya Civil Services Today, Frontline, Mainstream.
Newspaper rawn tlak te: The Hindu, The Indian Express, Business Line, Hindustan Times, The Times of India.


V. Lalengmawia
Champhai Vengthlang.