Wednesday, October 29, 2008

DAMDAWIIN, DOCTOR & NURSE LEH MIPUI

Damdawiin hi a pawimawh a,dam kan duh avanga damdawiin pan kan ni.Hetah hian mirethei leh chanhai ve tak tak ten inthlahrung tak chungin doctor leh nurse te an be ve a, damdawiin lama thawk ten chhan dan an thiam hle a ngai thin.Heng mirethei te te ho hian mahni in dah hniamna rilru kan nei duh thin hle a, doctor leh nurse ten kan duh ang zan lo deuh a min chhan chuan dam a hnekin kan kan dam loh phah zawk thin a ni ber.Chuvangin doctor leh nurse te hi kan pawimawh a ni tih hi hriat a tha hle.Mi rilru na taka siam leh zak taka siam hi dam beiseia lo kal te beidawnga siam a awl hle thin a ni.

Tin, lehlamah erawh chuan mipui hian kan tawngkam leh chet zia ahte zir tur tam tak kan nei a ni.Damdawiin a thawkte hi mihring ve tho, thinrim ve thei, thinchhe ve tak tak, amaherah chu thinchhiat avanga misual ni lo, vin ve fe fe an ni.Pathianin doctor emaw nurse an nih avang ngawta zaidam tur leh englai pawha dam lo te tawngkam nem hlanga ti diai diai tura a siam an ni bik lo tih hriat tur a bi.Dam lo awmpui ten a kan hriat fo tur chu damlo kan hun lovah in kan tum phet te,phal bak aia tam dam lo bula am tlat te, damdawiin chhunga mei zuk te hi chin tam loh ah a tha hle ang.Hetiang anga danin a phal chin baka chete doctor in emaw nursein ema an hauh te hian a hau tu kha mi sual taka kan chhuah fo te hi chin tam loh a tha hle.

Tin, damlo leh awmpui tu ten nurse kan koh dan hi a mawi lo hle.Vai chhe te te chuan nurse hrim hrim hi ‘sister’ an ti mai thin, kan ti thiam ve lo a nih pawhin ‘ka pi’ tih mai tur a ni.Hei nurse nu lo kal lawk teh tih ching kan la tam mai.Anih leh office ah mi kan dawr a, LDC/UDC kan be hmasa a, hei LDC, i pu a awm em kan ti ngai em?Kan fate sikul luhna tur kan buaipui a, hei, zirtirtupa admission a la tih theih em? kan ti ngai em.

Apawng apuia nurse leh damdawiin a hna thawkte induh leh biak har tihfo pawh hi a tul lem lo. Office tam tak (a zavai deuh thaw) a thawk ho hi biak an har fe zawk lo maw?. Damdawiin-a hauh ngai ho hi dam lo leh a awmpuitu te thiam loh a ni fo. kolkata-a Woodlands Hospital-a damlo kan tlawh ve tum pawhin ,Mizo-ho bawk hi dan bawh chhia a, pahnih aia tam damlo kantu kan ni fo. Kothari Medical Centre, Kolkata-a damlo awmna room tukverh zawna kuhva eina hnu sen luai khu Mizo-ho kuhva eina hnuhma vek a ni. Tunah hian rawng an hnawih tha tawh nge phei chu ka hre lo a.

Pakhat leh chu Health Worker leh Nurse-te veng chhungah damlohna thu ah te,inchiu, drip khai,dressing ah te kan ko fo thin.Hengah te hian a awm tawk chu Health Worker Association leh Nursing Council-in inkohna man a siam a.A hre lo pawh in hawih hawm nan tal a awm tawk inkohna man hi pek ziah a tha , a chhan chu zingah hma tak takah te leh zan rei tak mut reh hnu te hian kan ko thin a,mipui in a nachang kan hriat fo hi a tha.

Lumet turin lumet thiam kan ko a, kan fate tuition lak sakin ‘home tutor’ kan ko a,koh man kan pe thin a ni. Nurse an nih a vang in inkohna man pek nachang kan hre lo fo hi kan mawl vang nge nurse kan ngaihsan loh vang zawk?

Tin, thil pakhat leh chu damdawi chungchang hi a ni.Medical Representative ho hian an Company siam damdawi an hralh theih nan Doctor te hnenah a thlawnin damdawi an pe thin a.Damdawi bur pawnah pawh ‘Physicians Sample-Not to be sold’ tih a in ziak thin. Heng damdawi hi Doctorin Nurse leh Nurse lo te pawh a pe ve thin a ni .Doctorte pawh hian a thlawnin an hnena damlo in entirte an pe fo zawk a ni.Amaherawh chu, lehkhathiam awm fe fe te pawhin Doctor emaw Nurse emaw eiruk an ti fo thin.Heng hi Doctorte leh Nurse eiruk ni lovin damdawi zuartu ten an damdawi siam an hralh theih nana a thlawn a an pek a ni zawk.

A tawp berah chuan damdawi lam a thawk te hian tawngkam thlahdah lo se,an tawngkamin mi a ti dam in a ti damlo thei tih hre thar leh se la a tha hle ang. Tin,damlo leh a awmpuitute lam pawh in phal chin bak aia tam in awm pui lovin,damdawiin chhung bazar emaw ti a bengchhen te, meizukte,tham lo tak leh chaldelh taka damdawi in lama thawkte koh hi sim i tum theuh ang u.


Lalrumvunga

1 comment:

lalrinfela said...

three cheers to this article..doctor te leh health care a thawk te hi mihring ve tho kan ni a.stress level sang tak hnuaia thawk kan ni deuh reng thin..officer ve rau rauah poh desk job a nih loh vangin mipui te en dan pawh a dang deuh a ni mahna.ka vei ve pakhat mai mai chu 'MBBS satliah' tih tawngkam hi..ni e an thiamawm tho mai,'a seat hmuh harsat zia leh a rei lo berah kum 5 leh chanve theihtawp a pass ngawr ngawr tal tuma kan fight nasat zia hre ve tan chuan mbbs passed poh hi a satliah lo..

amaherawhchu, he profession pawh hi a commercialised mah mah tawh ni te hian ka hre ve thin..still then baal hma a thingthi ngai lo doctor tam tak an la awm e.....thank you