Wednesday, August 31, 2011

Important Days a thutna rem

Republic Day leh Independence Day hian thutna rem chungchangah kan buai fo thin. Aizawl Sipai Lammual chu thutna te a tam a, buaina lutuk an nei kher awm lo e. District dang ah chuan Playground tha te kan nei lem lo bawk a, thutna rem chungchangah hian buaina leh sawiselna a tam viau thin. Saiha ah bik phei chuan paralel authority State Govt leh MADC sawrkar a awm avangin thutna thu hla ah kan buai ber fo awm e.

Important Days ah hi chuan a tirah a hman dan tur kan rel ve vek thin.Hetiang meeting nikhuaah hian Head of Department te hian chumi kha mi chu a hmaah in thut tir a, chumi khami nen an rank a in ang reng si tiin sawiselna a awm fo thin. Saiha angah hi chuan Mizoram sawrkarin Protocol Manual a tih chhuah ang diak diakin a kal theih hauh lo mai a. Thutna rem tu ten awm leh rem chang, an pay scale leh nature of duty anga rem a ni tlangpui thin. Doctor leh College Principal ho hian BDO te a hma lamah in thut tir a, an rank pui Asst.Professor leh Medical Officer te hnung lamah in rem leh si tiin an sawisel fo thin. A awm viau reng bawk a ni.Amaherawh chu rank khat rau rau ah nature of duty te hi ngaihtuah a ngai a. Kumin Independence Day Meeting naah pawh kan DC chuan thutna rem hi lal leh lal loh, hlawh hnem leh hlawh hnem loh chungchang a ni lo. 'Kei aia hlawh hnem Saiha District ah hian an tam lutuk, mahse DC (as an institution) ka nih vangin a hma ah ka thu mai zawk a ni' tiin a sawi nghe nghe a.Kei pawhin College Principal vuina Medical Officer leh Asst.Proffessor te thutna chungchang chu sawiin, rank khat an ni meuh mai a, mahse BDO te chu Head of Department an ni. DDO power nei, administrative control leh financial control nei an ni a, Medical Officer leh Asst.Professor te ka ngaihsan loh vang ni lo in, teh khin theih an ni lo tiin meeting naah ka sawi bawk.

Tin, kan District a hna sang tak thawk (a hming leh nihna thup) chuan Palak Bial MLA Pu PP Thawlla hi a hmaah in thut tir ziah a, a dik lo a ti a. Protocol Manual ah chuan a awm si alawm, chutah chuan thut tir tur tiin ka hrilhfiah a, a ngawi ta a.Chu lo leh chu ka thianpa, kawmngeih em em hian District SP hi a thu ve thei lo, law & order en a, field sir vela lo awm tur a ni tiin min hrilh a!!!. Khaih khaih, SP te chu Protocol Manual ah chumi ah chuan an awm, nangni zawk kha Protocol Manual ah in awm lo a, kan duhsak che u, in thu ve mai mai zawk tiin ka hrilh bawk a.A ngawi ve ta mai a.MADC Officer, Mizoram sawrkara Selection Grade hlawh ang hlawh pha ho pawh hi a hnungah dah thin an ni a.Hei hi ka vei pui ve deuh na a rei tawh a, MADC a senior tak taka thawkte, state sawrkar a Entry level te aia thutna kan pe chhe ziah bik hi a awm lo e, a dik lo tiin ka lo ngaihtuah fo thin.Kumin Republic Day ah erawh chuan an pay scale a zirin kan rem ta bawk a, rawn kal pawh a phurawm khawp mai an ti nghe nghe.

Mizoram sawrkar Protocol Manual tih chhuah ah khan Ex MDC, Ex MLA te, Ex MP leh Ex-Minister a sawi lang miah lo a. Ex zinga a sawi lan chu Ex-Chief Minister leh Ex-Speaker te chauh a ni.Chuvangin kumin Independence Day lawm naah chuan MADC a Ex-CEM leh Ex-Chairman chu a hmalamah ka dah phah nghe nghe. A chhan chu CEM hi District Council a Chief Minister ang an ni mai a, Chairman hi Speaker ang an ni mai a.Chu pawh chu lo sawisel tawk an awm bawk.

Media hi an pawimawh a, kum 2010 Republic Day khan Press Enclosure ang deuh in, Pavillion Extension ah thu vek turin ka ti a, an lo duh i khaw lo mai a, kan haw vek dawn an ti ta mai a.Mahse Main Gallery ah thu turin ka hrilh leh a, an haw ta em lo a.A nihna takah chuan Media ho chu Enclosure hrang an siam tlangpui thin a, chumi a thut chu a fel ber maiin ka hre bawk.Chumi Pavillion Extension chu tumah thu duh hek lo, remchangah ka la a, Saiha a officer naupang below 40 ho thut tir nan ka hmang ta daih a, a tih zia phian a, a hnung leh a chunga thut ai chuan a nuam fe zawk a.

Thutna thu hlaah hian , ni e, fel fai taka tih loh chu a nuam miah lo. Saitual SDO a ka awm laiin World TB Day Health Dept in an hmang a, mipui zingah , a hnung berah ka thu tluan zak a, stage ah chuan Doctor te, VCP te, YMA President te an thu hlawm a.Mahse World TB Day vanga kal alawm ka nih, stage a thu tura kal ka ni lo ka ti ve tlat a,lungawi takin ka awm tluan chhuak parh a.

Saihaah hian DC/Mizoram Govt leh MADC hian tih pui ni hi a hrang ve ve an nei thin a.Kumin Lyuva Kutthla pawh kha a hma ni ah Field ah kan in hmu a, ka Invitation tur kha khaw laiah an ziak chawp a, min pe a, chu erawh chu a phuahchawp lulai deuh em mai ka ti a, ka kal sak ta lo a ni.Tin, Republic Day hian DC in sawm bik te tan 'At Home' a buatsaih sak a,Independence Day hian CEM MADC in a buatsaih thung a. Kum 2010 Independence Day khan At Home chu CEM in a buatsaih a, DC Office atangin DC leh Addl.DC chauhin sawmna a hmuh avangin kan nau te chu an kal lo a, kei pawh kal loh mai ka tum a, mahse Aizawl atanga kan Khuallian vahvelna kha a coordinate tu ber ka nih avangin ka kal hram a.A hnuah chuan an hotute ka hrilh a, min theihnghilh ngai ta lo.

Ka han sawi duh tak chu, mihring hian pride kan nei lian em em a, thutna thu hla mai mai ah te hian buai lo ila, thutna min pek chuan lungawi takin thu mai ila, kan thil neih in a la zir lo a, hmun tha kan chang reng thei bik lo tih hi pawm thiam ila a tha berin ka hria.