Monday, August 25, 2008

Chapui Sangha Tlangvuak naa Thaichhawni nu kan man

Sonia Gandhi at Tongkolong

Welcome to Tuipang......

Tuipang BDO ka nih lai



Tuipang BDO ka nih laia ka office chhung a ni.Tuipang chu ngai tak chungin ka chhuah san a ni si a...Eng tik ah tak Tuipang,Lomasu,Tongkolong,Chapui te chu hmu leh tak ang i maw

Buanga...My beloved Dog



Buanga tia duat taka ka koh ka ui,ka ui te ti mai ila ka awm hmaa lo awm in a a ui khawi ka chhawm a ni a.Tuipang BDO staff ten an lo talh daih mai a.Ka mittui a tla lo chauh.Mihring anga kan en leh kan hmangaih,fing leh fel bawk si a ni a.A dam loh pawhin in chhungah zun a cheh ngai lo a,a e ngai bawk hek lo.

Vawi khat pawh ui lian in hmun 5 velah a lo seh vak a,a dam lo nasa mai a.Chumi tum pawh chuan kan chhunga kan buaipui hnu in a dam leh.

He ui khawngaih thlak tak hian tunah chuan mual min liam san ta.Khawvel hi a lo mak ngawt mai.Ui leh ran ngaina ngai lo tak ka ni a.Mahse Tuipangah sawrkar in June 2006 ah min sawn avangin ka phei a.Ka Qtrs tur ka luh chuan he ui hian min lo lawm chawng chawng a.Ui ngaina ta lo chuan ka vin vak vak a,ka peon hnenah chuan la bo nghal rawh ka ti a.Mahse a la bo mai lo a.He ui chu a fel ta phian mai a.Ka hmangaih ta hle a ni.Aizawl atanga Tuipang kan thlen te,thingtlang atanga in kan thlen te hian min lo lawm chawng chawng thin a.Ka ngai tak zet.

Min thlak tuin tha takin a vulh chho ve ang chu tih nak alaiin a staff te Saiawia,Alfred Nohro leh Ambrose Khaihmeichho ten a lo talh chu niin.Ka khawngaih tak zet.Hetianga ran pawisawi lo leh duat lai an ei duh mai hi a sak ka ti a.A talh tu te leh a sa ei tu te hi an nun a hmui ngil bik hauh in ka ring lo.

Friday, August 22, 2008

Zawlnuam!!!

A zawl a,mahse a nuam chiah em.Zawlnuam hi Mamit District ah chuan khaw lian pawl tak a ni awm e.RD Block thut hmun a ni a.Kawrthah SDO Civil hnuaiah a awm.Zawlnuam RD Block ah hian khaw 44 lai a awm a.A zau hle a tih theih awm e.

Zawlnuamah hian mak tak maiin Deptt hrang hrang an tha hnem ang reng a.Mahse a kawng chu chhe rem rem tak a ni.Zawlnuam khawlai kawng pawh a sawh na tawk tawk hle.Telephone hi a awm ve a,mahse a nung ngai mang lo.Mobile network phei chu van a rah ang a ni.Tui erawh chu a tha hle.Tripura an hnaih a,hnam chi hrang hrang an tam hle.

A khaw lum vang emaw ni teh reng ni Zawlnuam khaw ho hi a hmei a pa in an lian tlang pui a.An hmel chhe lo ang reng.A nawlpui a lak chuan khaw hmel chhe lo leh khaw mihring lian pawl tak an ni awm e.

Kanhmun khuaah erawh chuan mobile signal a tha em em mai.A chhan chu a ral leh lam kha Tripura khua Damchera a nih tawh vangin.

Brus E/Roll Hearing nei dawn.

Ni 1 Sept 2008 atanga ni 5 Sept 2008 hian Brus Transit Camp a Mizoram atanga tlan chhia Brus te tan Electoral Roll Hearing chu Pu Rotluanga Project Director,DRDA Mamit leh Pu V.Lalengmawia,BDO Zawlnuam ten an nei dawn.Heng Brus Transit Camp Naisingpara,Kaskau,Khakchang leh Hamsapara velah an kal ang.Hemi atan hian DC Mamit in ruahmanna a siam hun hun ah kal a ni ang.

Tuipang Chhuahsan

Tuipang chhuah san han tih ah sawrkarin Tuipang atangin min sawn.Zawlnuamah min sawn ta vawng vawng ka tihna a ni e.Tuipanga ka awm chhung khan ka theih tawpin hna ka thawk a,mipui pawh ka hmuh dan chuan min thlawp viau.NGO hrang hrang nen in lai chinna tha tak kan nei bawk.Ni 10 July 2008 khan charge ka pe a.Ni 11 July 2008 ah Aizawl kan pan a.Ni 14 July 2008 ah Zawlnuam ka thleng.Tuipang chu chuuah san mah ila ka ngai reng tho a ni.

Mara mipuite an fel a,an ngaihawm a,an ngainat awm tak zet a ni.Tuipang leh Saiha hrim hrim hi ka lo ngai hman tak zetin ka hria.Tuipang a mi te ka biak hian ka lung a chhe tlat thin.

Eng tik ah tak Tuipang chu hmu leh ang i maw.He thu chhiar a,Tuipang mi in awm a nih phawt chuan ka ngai tak zet che u tih in hre mawlh mawlh dawn nia.An lung pawh a lengin min ngai ve ngei ang tih ka ring tlat ani.