KHAWVELA DICTATOR TIH BAI AWM ZUAL TE

KHAWVELA DICTATOR TIH BAI AWM ZUAL TE

V.Lalengmawia

Dictator chu ram khat roreltu,ama thu thu a thuneihna pum hmawm leh ram mipuite chunga lal hrawt tak ho hi an ni a.Heng dictator ho hi mipuiin duh duh dan angin tih tlak hi a harsa hle ni tur a ni,an ram pawhin a tawrh phah nasa thin hle.Khawvelah hian dictator rothap pui pui kan hre teuh awm e.Uganda President Idi Amin a te pawh kha mi sual tawp khawk leh ro thap niin,engmah pawisak nei lo,mihring sa te hial pawh a ei tia sawi thin a ni.Tun tumah hian khawvela Human Rights pawl chi hrang hrang Human Rights Watch,Freedom House,Reporters Without Borders leh Amnesty INternational ten khawvel ram hruaitu te zinga mi sual a thlan khawm chanchin tlem kan ziak lang ang.

Omar al-Bashir President of Sudan

He Sudan President hian kum 2003 atang khan mi hring,civillian mi 180,000 lai that tawh a chhut a ni.Hemi bakah hian Darfur a buaina avangin mihring Maktaduai 2 lai chu chenna nei lo in an awm phah bawk.Tin,Southern Sudan hi Christian tamna leh Christian hel te awmna anih avangin nasa takin sawrkarna chelhtu Omar al-Bashir pawl Muslim sawrkar chuan nunau a sawisa thin.A sipai te khaw hrang hrangah tir kualin refugee camp te,mihring chenna in rap in te a hal tir thin.Heng avang hian Africaah tam a tlak nasat phah bawk.

Kim Jong-il President of N.Korea

Kim Jong-il hian rorelna hi a kutah a dah pum hlum thak a.A ram mipuiten duh dan leh ngaihdan a sawi phal sak a ni lo.President Bush pawhin a kaihhruai N.Korea hi ralthuam hlauhawm nuclear weapons siam tum anih avangin US Terror List ah leh Axis of Evil a tihah a lo telh tawh thin.A rorelna hnuaiah chanchinbu miten zalenna an nei lo a,sawrkarin a khuahkhirh tlat a,duh duh ziah phal a ni hek lo.Kim Jong-il rorelna hnuaiah mi 250,000 aia tam daih sawisak leh tan tir an ni a.A ram nasa taka a sawisak avangin ramdang sawrkar tanpuina pawh a lut tlem hle.Chuvangin riltam a thi tur naupang an tam hle.A thenawm ram S.Korea nen an in ngeih lo hle bawk a.S.Korea chu democracy sawrkar anih avangin mipui an hlim a.N.Korea mipa naupang kum 7 a upa chu a ei a chhiat avangin S.Korea a naupang kum 7 mi aiin inches 8 aiin a thang thei lo a,a cher pawh a cher zawk tih UN Food Programme chuan a sawi.

Japanese Professor pakhat chuan Kim Jong-il hi kum 2003 khan a thi tawh a.Mahse Communist sawrkar chuan thi lo ang a lan tir a tum avangin a lem in (dummy) ro a rel mek niin a sawi ve thung.

Than Shew of Burma

Kum 1992 atangin rorelna a chang a.A hnuaiah hian mipuiin zalenna an nei tam lo hle.Chanchinbu mi te nasa taka khuahkhirh an ni a.Kum 2005 November khan engmah sawi lawkna leh in rin lawkna pawh awm lovin Burma khawpui chu Rangoon atanga km 245 a hla Pyinmana ah a sawn thut mai a.Sawrkar hnathawk kal duh lote pawh ban ah a vau bawk.Than Shwe hnuaiah hian naupang sipaia tan luih tir a hluar hle a.Tih luih naah hnathawh tir a hluar hle bawk.Deomocracy chu rap betin mipui ten an duhtaka an thlan Aung San Suu Kyi pawh tun thlengin pawn chhuak thei lo a siam a ni.

Robert Mugabe President of Zimbabwe

Kum 1980 atangin Zimbabwe President nihna a chelh a.Tunah hian kum 82 a ni tawh bawk.Kum 2000 khan Land Reform atangin Zimbabwe President hian Mingo (White) hi huatna a siam a.An ram te chhuh sakin nasa takin mimngo te a nghaisa bawk.Tunah hian an ram a sawisak nasat em avangin thil man a to phah nasa em em a,a let za tam takin thil man a to a ni.Tunah hian US Dollar khat leh Zimbabwe Dollar maktaduai khat lai a in tluk tawh.Kum 2005 khan Mugabe chiuan mi 700,000 lai chu an huan leh in leh lo atanga hnawt chhuakin,an huan leh ram chu a hneh chhuh a,tam tak chu hlau in England ah an tlan chhia a ni.Heng avang hian khawthlang sawrkarin nasa taka demin economic a a tanpuina te a tih tawp phah bawk.Tunah chuan hman laia ram nuam leh hausa thin kha ram rethei ber pawlah Mugabe chuan a chhuah ta a ni.

Islam Karimov President of Uzbekistan

Kum 1990 atangin President nihna a chelh tan a.Amah dodaltu politician leh businessmen tam tak chu tan tirin,sawisak hlum te an ni thin a.A tam zawk chu kah hlum an ni thin.Amah dodaltute chu hreh miah lo in a sipaite a kahhlum tir hmiah hmiah zel a ni.Kum 2005 khan mi 10,000 lai chu pung khawmin an lungawi lohna lan tir an ni a.Heng mipuite hi Karimov chuan engmah sawi set set loin sipaite a kahhlum tir hmiah mai.Amah hian thil ti sual thei lo turin dan a siam hmiah bawk a,amah leh a chhungte chu eng dan mahin a phuar lo a ni.

Hu Jintao President of China

China chu economy ah an thang tiin khawvel chuan an hre thin.Amaherawh chu mihring maktaduai 150 lai chu rethei bakberh niin nikhatah US Dollar khat pawh an hlawh chhuak lo a ni.China chuan khawpui lian leh langsar lai a chei thur thur laiin an ram kil zawkte ngaihthahin retheihna in a tuam nasa hle.Hu Jintao rorelna hnuaiah hian political prisoner mi 300,000 chu tih luihna a chhawr turin ram pilrilah thawn darh an ni a.Internet leh telephone zawng zawng pawh sawrkarin a monitor vek zel.Press freedom a awm lo a,TV leh radio channel reng reng sawrkar ta vek a ni.Olympics 2008 a in buatsaihnaah pawhin Beijing a cheng mihring 400,000 vel chu tih luih naa an chenna in tih chhiat sak an ni.

King Abdullah of Saudi Arabia

Saudi Arabia ram chhungah reng reng phone call te hi sawrkarin a lo record vek a.Mobile phone pawh camera awm chi reng reng a khap hmiah bawk.Chanchinbu ah sawrkar leh lal chhungkaw sawiselna chi hrang hrang ziah phal a ni lo a.Hmeichhia ten an laichinte ni lo khawlaiah an kal pui phal a ni lo.

Saparmurat Niyazov President of Turkmenistan

Kum 1990 atanga tun thlengin rorelna a la chelh a.Car tape te,music te leh inneih naa music play leh lam te a ram chhungah a khap bur mai a.Sipai te sawrkar siam a duh avangin a ram a damdawi lam thiam mi 15000 lai chu ban in damdawi lam thiamna nei lo sipai te a dah daih bawk.Doctor ten thutiam an lak thin Hippocratic Oath chu lak phal loin ama hminga doctor ten thutiam an lak tawh tur thu a puang.

Toedora Obiang Nguema President of Equatorial Guinea

Kum 1979 atang daih tawh khan he ram rorelna hi a chelh tan a.Zirmi te chuan tih duhdahna leh in tih thaihna hihe ram nitin nun hi a ni an ti tawp mai a ni.Mimal zalenna a awm lo a,chanchinbu zawrh leh lehkhabu zawrh khap tlat a ni.Tuialhthei lamah a hausa hle a,mahse heng a ram hausakna zawng zawng hi he pa hian changin kum 1995 khan US Dollar 700 million zet chu a ma private bank account ah a dah lut tih thu dawn a nih laiin,a ram mipuite chu riltam a thi lek lekin an awm thung.

Muammar al-Qaddafi President of Lybia

Kum 1969 atang daih tawh khan Qaddafi hian Lybia ah hian rorel na a tan a.Amah hi khawthlang sawrkar te pawhin nasa takin an sawisel thin.PanAm thlawhna bomb tu te pawh kha Qaddafi hian a lo tanpui a ni.

Lybia ram ah hian tun hnaiah foreign company te hnathawh phalna pek ni mahse,a ram chhung tak takah chuan mimalin zalenna mumal an la nei lo hle a.A ram chhunga mitinte hi an in ringhlel kualin mi za zela 10 te hian mihring zawng zawng za zela 90 te hi an enthla reng tih US State Deoartment chuan a sawi.Lybia ramah hian collective punishment a hluar hle a,chhungkhata member pakhatin thil lo ti sual ta se,an chhungkua leh an laina hnai ten an tuar tlang vek thin.Qaddafi sawisel hi thih thleng hrem theih sualna niin ngaih a ni.

King Mswati III of Swaziland

Kum 1986 atangin Swaziland lal nihna a chelh tan a.Heti hun lai hian kum 18 chiah a la ni.Swazi mipui te a duhdan dan in awm tirin,retheihna khur puiah a luh pui a.A ram mi tam zawk te chu nikhatah US Dollar khat aia hniam a in hlawhte an ni.Heti chung hian a ni chuan nuam tawlin hmun hrang hrang a fang thin.A ram mipui za zel a 40 hian AIDS natna vei anga chhut an ni bawk.King Mswati III hian political party reng reng a khap a.Thil sual ti ve thei lo ah in ngaiin hremna engmah lal chungah hian lek theih a ni lo.

Aleksander Lukashenko President of Belarus

Europe khawmualpui a dictator awm chhun a ni awm e.Kum 1994 atangin President nihna a chelh tan a.Hemi hnu hian a President nihna remchanga a la in vawi tam tak Constitution siam that a ni a.A rorel dan hi a ro thap hle a.A hmelma te chu live television hmang te in a sawisak tir thin.Communist sawrkar in an chin em em thin ‘mutual surveillance’ te,mi in hek leh telephone ngaihthlak rukte a hluar he.Amah sawi sel chu thihna khawp hiala hrem theih a ni.

Fidel Castro President of Cuba

Kum 1959 atanga rorel tanin khawvel dictator te zinga rorelna chelh rei ber a ni ta.Freedom of speech a awm lo a.Chanchinbu te leh magazine te pawh sawrkarin a khap hmiah mai.Mobile phone pawh hun engemaw chen hman phal loh a nih hnu in tun hnai khan mobile phone leh computer chu hman phal a ni ve ta.Tunah hian Fidel Castro hi President ni tawh lo in a unaupa Raul chu President atan lakluh a ni tawh.

A chunga dictator kan han tarlan takte khi khawvela human rights group hrang hrang ten an tehna atanga a sual leh taw rawt pawl an ni a.Mi tam tak chuan George Bush pawh hi dictator sual ber a ni e an ti fo thin.An tihna chhan chu World Trade Centre tih chhiat anih vang leh Irag in weapons of mass destruction a siam avanga Afghanistan a Taliban leh Irag a run avanga pawisawi lo nunau tam tak an thih vang kha a ni awm e.Amaherawh chu President Bush chuan nu nau pawisawi lo te kha a target ni lo in,khami ram a rorelna chelhtute kha a target an ni zawk tih kha hriat tel a tha awm e.Indona ah chuan nu nau in tawrhna a nei lo thei lo ve bawk a ni.