Mizo nih hi a nuam lem lo ve

Mizo nih hi a nuam lem lo ve - Hlimpuia, Jampui

Kum 1997 October thlaa Mizorama thil thleng kha mahni kutzungtang kan hriat tlukin kan la hre chiang ngei ang. Bru hovin Mizoram chhuahsana Jampui Tlang (Tripura) an rawn chuanchhuah tantirh khan khaw thenkhata YMA-te chuan an ei leh in tur tlaivar thaka buaipuiin an lo chhawmdawl a nih kha.

Nimahsela chawlhkar khat pawh a liam hmain Upper Dosda leh Banchera khuaa Mizo awmte chu Bru raltlan leh an chhehvela Bru awmte chuan an bei nghal a, inchhung bungrua bakah an ranvulh - bawng, kel, vawk leh ar te an la fai vek a, tuikhuah sangha quintal bi tak meuh an mansak vek a ni. Satnala khua leh Tualsen khua te pawh hetiang bawka beih an ni. Nunna humhim tul avanga mahni haklai nen chauva tlanchhuak an nih avangin in leh lo, ui leh ar, ser huan leh kuhva huan te an chân fai vek a, chhut sen chi a ni lo. Kha buaina avanga Sakhan tlang leh a chhehvela Mizo ten namen lova an tawrh dan kha tum khat maia ziak sen chi a ni lova, tun tumah hi chuan Sakhan Serhmun lam kan hawi bik dawn a ni.

Sakhan Serhmun khua pawh um chhuah nghal an ni chiah lo nain an tuarna a nep chuang bik lo. Nasa taka nekchep nghal an ni a; chiseh an lakna awm chhun Ananda Bazar an tlawh pawh thei lo nghal a, sorkar hna thawkte tan lah Bru chenna hmunpui leh raltlan inkulhna hmun te kaltlang rual a nih tak loh avangin hlawh (salary) an la thei hek lo. Bru te chuan Serhuan an suasam a, a rah lawh mai duh tawk lovin a zar an titliak chiam a, a veng tura daipawna awm ngam a nih tawh loh bakah Mizo kâ atanga khapna thuchhuak reng reng chu Indo thu puan tluk a ni ta zel mai si. Tharuma rawn beih tum a nih thu a lo thleng reng a, mahse ram dinhmun enin tanpuitu Mizo hmel lo hmuh chu beisei phak rual a ni lo. Pathian kuta inkawltir leh thih ral thak thlenga tankhawh tura inbuatsaih bak kawng dang zawh tur a awm ta hauh lo.

Chutih lai vek chuan 'Lo chhuak thuai thuai teh u, kan chetna in dal reng mai' tiin Mizoram lam atanga thu kal zel chu Signal-in a thleng reng a. Chu chuan an rilru buaina a tizual a, mahni hnampui te mawhchhiatna a sâng thei hle dawna a lan rual rualin Mizo tak pawhin ngaih pawimawh tham a tling reng a ni. Mahse chhuahna kawng a awm ngang si lo. An mu thei lova, chaw an ei thei hek lo. Bel chhunga tui rawn so chho mekah an talbuai a ni ber mai. Naupangte chu thlamuang taka mu turin an hnem a, thlaphang tak chungin an muhil ve leh mai bawk thin. 'Hengte hi ka venghim zo ang em? Nge kan thi fai vek zawk ang?' tia nu leh pa ten fate muhil hmel thlir vawng vawng chang a tam mai. Hetih lai hian khaw hrang hrang atanga Mizo nekchhuah te chuan engemawti kawng kawngin Jampui tlang an thleng tawh hlawm a ni.

Manganna leh buaina karah hun a kal zel a, December thla a lo thlen chuan khawbu chhuahsan tawh ten 'Engtin nge Krismas kan hman ang le?' tia an kun mek laiin Sakhan Serhmun-a la awmte chuan Krismas an thlir thei tawh bik lova. 'Engtin nge kan chhuah ve ang?' tih leh 'engtin nge in leh lo, ui leh ar, inchhung bungrua, serhuan leh kuhva huan te kan tih tak ang? tia inhambuai chu tihmakmawh a ni ve thung. Chutih laiin sikul lamah Cl.I-VIII kum tawp exam neih fel ala tul si. Venhimna lam thlahthlam theih a la ni chuang si lo, buaina a chhahzia kha... thua sawi fiah sen a ni love.

Boruak a zang chho hret a, Jampui tlang atangin Tripura Group YMA hruaitu ten a hmuna kalin an chhuah ve dan tur an ruahmanpui thei ta, a va lawmawm em! Kum 1998, January thla tira pem chhuak turin hma lak tan a ni ta. Sakhan tlang atanga phairuam lam pan thlak hnuah luidung thul tak zawh leh ngai a ni. Chutianga K.M. 12 zet kea kal hnua motor kai thlen chauh tur a nih avangin bungraw lian tham te leh an ranvulh te chu tihral hmasak a ngai ta a. A man inawmtawka lei tur mihring an awm si lo, a thlawn tluka mi kuta an hlan tak, mittui nena an thlir liam te kha... chhiar sen a ni lo.

Chutih lai mekin in leh in, ram leh ram inthlengpui tur zawngin Mizoram atanga lo chhuk Bru thenkhat an lo lang ve ta. A thlawna kalsan ngawt ai chuan ti bawkin mi thenkhatte chuan an inrempui ta nual hlawm a; mahse chu pawh chuan a daih sen loh avangin serhuan leh kuhva huan engemaw zat chu kalsan a ni ta nge nge a ni. Chutianga an kalsan in leh huan te chu Tripura hel pawl pakhat NLFT te chuan neitu nih hauh nghalin sum hnar atan an hmang ta hmiah hmiah mai a. Kum sawm a lo tlin tak hnu pawh hian a neitu dik tak Mizote hnenah hian an la pe kir duh lo fan a ni.

Chutia chhuak mai tur an nih lai mekin Krismas hun a lo thleng leh ta, ava lungchhiatthlak tehreng em! Hmawngchuan khua atangin Krismas hmanpui turin Lalpan thalai rual a hruai thleng leh ta mai, ava lawmawm tehlul em! Krismas chu engemaw titiin an hmangho hram a, kum danga Krismas chu a ang thei tawh ngang lo a ni e.

January 9, 1998-ah chuan Sakhan Serhmun-a Mizote chu Group YMA hmalaknain hruaichhuah an ni ve ta. Hemi ni tukthuan ei fel hnu chuan Group YMA hruaitute chuan Tawtawrawt an ham ta; mipui an lo chhuak zel a, a then an kal zel laiin nu leh pa engemaw zat chu mahni in chhuahsan hlei thei lo, tap chunga khalh chhuah ngai te pawh an awm nual mai. An in te, serhuan leh kuhva huan hringdup mai te chu an thlirlet chamchi a, mahse chikhawna chang em lovin Jampui tlang chu zanah an thleng thei ta a ni. Hmunpui khua an lo thlen chuan zan thim pawh sawi lovin mipui tam takin ei tur nen an lo hmuak a; an hmelah lainatna leh khawngaihna a langchhuak theuh hlawm a, a ropui hle. Group YMA hruaitute tlawmngaihna leh hmalakna te, Pastor (UPC) Lalchamliana (a awmna kan hriat tak loh) tlawmngaihna te a chhuanawm tak meuh meuh a ni.

Khaw hrang hrang atanga Mizo nekchhuahte chu in leh lo nei tawh lo an nih hlawm avangin thenkhatte chuan khaw hrang hranga lainate an bel hlawm a, thenkhatte erawh chuan in ruak awm remchang apiang an luah hlawh ve thung. Tichuan, chhungkaw engemaw zat chu Jampui tlanga khaw hrang hrangah an awm ta a, chhungkaw engemaw zat erawh chuan Mizoram thleng chhovin khaw hrang hrangah awmhmun an khuar ve ta a ni.

Hun a kal zel a, Mizo raltlante dinhmun ka thlir chang hi chuan 'Mizo nih hi a nuam lem love' ka ti thin. Mizo raltlante chu eizawnna mumal nei lo an ni ta. Ei leh bar harsatna avangin chhungkaw tamtak chu an inthen darh (khawsa hrang) a, hmun hrang hrang an pan darh na chungin harsatna an pal darh zau mai niin a lang. Kum sawm a lo pumhlum ta hial a, Mizo raltlante hian chhawmdawlna buhfai engzat nge an dawn a, tangka engzat nge an dawn ve tawh le? Tripura-a awmte hi chi tam zawk (tlangmi) eptu nei an nih avang nge Vai sorkar hian a ngaihsak duh lo tia ngaihtuahna a kal mek laiin Mizoram thleng chho ta te pawh Mizo sorkar hian lainatin a lo uksak bik lem lo a ang hle. Hmun thenkhatah phei chuan inlainata lo inchhawmdawl a hnekin an lo huphurh a, thik tlak loh an lo thik a, inchung tur Rangva dawng ve tura thenkhatin hma an lakpui mek laiin dawng lo tura hma lo la ve char char te pawh an awm thin.

Kum 1998, kum laihawl velah khan Sakhan Serhmun atanga raltlan, Darlak khuaa pemlut, pa upa lam ni tawh Pu Ropianga te nupa chu khatih hun laia Mamit D.C. khan lainata an thlavang lo hauh ahnekin a chhan leh vang hriat tur pawh awm hauh lova zu rui chunga a lo tim nek mai te rilrua a lo lan chang hi chuan 'Mizo nih hi a nuam lem love' ka ti lo thei lo a ni.

Kum 2004-a Tripura Mizo Raltlan Welfare Committee-in Mizoram Sorkar Home Department-a Mizo raltlante chhawmdawlna dila lehkha an thehluh kha Mizo raltlan, dinhmun lo tleu tawh te tan chuan beiseina tungding lehtu a ni ngei ang. He Welfare Committee thu leh hla lo dawngsawngtu Home Secretary Pu C.Ropianga'n duhsakna leh lainatna nena hma a lak zel tur thu a lo sawi chu chanhaite tan chuan 'Chanchin Tha' a tling ngei ang. Mahse hun rei tak chanchin hriat tur a awm leh tâk loh avangin, Jampui tlanga Mizo raltlante chuan Aizawl-ah palai tirin April 25, 2006 khan Pu C.Ropianga chu a office-ah an hmu leh a. Hemi tum hian Home Secretary chuan Mizo raltlante chungchang chu Central Home Department-a a thlen hnuah mi tutute emaw a sawipui leh thu te, Bru helho lo kir leh te chhawmdawlna a awm hunah Mizo raltlante tan pawh chhawmdawlna a awm tur thu sawiin he hun hi lo nghak phawt turin raltlan palaite chu a lo hrilh a ni.

Kum hnih lai a liam leh ta. Bru helho kir leh ten chhawmdawlna vawi engemaw zat an dawng tawh a, sawi nuam an ti a, mi hmaa tangka han phawrh vel nuamti pawl bo hek suh. A nih, Mizo raltlante tan hian chhawmdawlna hi a awm ve dawn lo em ni ang? Tute emaw kailawn tisangtu a lo ni tawh zawk em ni dawn le? Nge inthikna avang bawkin thil a khawlo leh ta zawk? Kum 1993-a Sakhan Tlangsang atanga pem chhuak, tuna Phuldungsei khua (Jampui)-a awm ten Pu R.Khawpuithanga, MLA leh T.Z.A. te behchhana raltlan nih ve an lo tumna chu Welfare Committee bultuma hmalakna tikhawlotu a ni em (?) tih chu mi tam tak rilrua zawhna awm mek a ni leh ta. Thu dik hi khawiah nge a awm le?

Mizo raltlante dinhmun hi i chhut chiang ngai em? Mahni duhthu renga pemchhuak an ni lova, nunna humhim tul avang zawkin mittui nen an lo chhuak a nih kha. Pi leh pu atanga an luah ram, Krista lo kal leh thlenga an chenna tura an lo buatsaih ve hmunah te chuan an theih ang tawk tawkin hma an la ve thin a. Sakhan tlangah hian Kuhva, Serthlum, Satkora leh Litchi te a tha em em a, heng huan te hi an eizawnna ber pawh a ni. Lohtheihlohna, (buai) avanga an rawn chhuahsan lai khan serthlum kung tam tak chu a la puitling lova, an vanglai an la thleng hman lo. Chuti chung chuan serthlum atang ringawt pawhin chhungkaw tamfe chuan nuai bi an tel tawh a ni. Heng Mizo raltlan zingah hian chhungkaw hotu, pa upa lam ni tawh engemaw zat an awm a. Hengho tan hi chuan an dam chhungin hetiang dinhmun hi an insiam dawn tawh hauh lo tih a chiang reng mai. Kum 1997-a Mizorama thil thleng kha heng mite tan hi chuan 'Vanpui chim' a tling tak meuh a ni.

Kum sawm a lo liam ta hial a, chhungkaw hotu eizawnna kawnga rinpui ber mi pasarih te chuan thlanmual an liam tawh a, an kalsan chhungkaw dinhmun te han belhchian hi chuan lainatawm tak an ni. Harsat zual changte leh Krismas a lo hnaih a, sum indaihloh hun a thlen apiangin an serhuan kalsan tak te an hrechhuak vawng vawng thin. Heng serhuan leh kuhva huan an kalsan tak te hi tunah pawh hian a la tha em em reng a ni.

Mizoram buai tantirh 1966 atanga 1976 inkar chhovah khan MNF rammu ten tangka (tax) an khawna lo pe ve thin, chaw leh buhfai te an khawna lo pe ve thin a, India sipai laka an himna tur hmun lo panpui ve tawh thin heng Mizo raltlante hi MNF sorkar hian han mitsir ve hlek sela ava duhawm em! An tan Mizo nih hi a nuam leh thei ngai ang em le? Hetiang ringawta Krista lo kal lehna lo nghak tur hi an ni bik dawn em ni? Eng vang nge (?), Tute vang nge (?) tih te hi Mizo zingah hian chhutpuitu awm ve se Pathian duhzawng a ni ngei ang.

Sakhan tlang leh a chhehvela cheng thin Mizo te hi tam lem lo mah se, Mizo khawbu nghet panga lai luhchhuah an nih dan te, chung khua atanga raltlante dinhmun Mizo mipuite thinlunga a tlak nat lohzia leh awmze nei phaka lainattu an vanzia te ka ngaihtuah chang hi chuan kan hnam (Mizo) hi ka zahpui ngawih ngawih thin a, 'Mizo nih hi a nuam lem love' tiin tlang ka kawm leh thin a ni.

Source:vanglaini.org