LOOK BEFORE YOU LEAP.

Jammu and Kashmir ah khuan helho leh India sipai an in kah a helho an thih chuan Muslim ho khuan helho mithi ruang chu puan dum zuna khuh chung hian khawlaiah kawng an zawh pui chiam a, an au rual dual dual thin.Tin, Israel-ah khuan Juda leh Muslim ho an in tihbuai changa Arab ho thi an awm reng rengin Muslim ho chuan mithi ruang chu kawng an zawh pui ngei ngei deuh ziah bawk.Juda ho erawh chuan an mi te an thihin kawng an zawh pui thu kan la hre lem lo.Northern Ireland ah khuan Christian chi hnih Roman Catholic leh Protestant an awm a, kan hriat angin khu pawl pahnih Kristian ve ve si khu an in hal em em a, Kristian vek tho an ni si a, an mi te an thihin kawng an zawh pui ngai lo bawk.Kristian ho hi chuan an mi te ruang hi khawlaia a ual au thei ang bera kawng zawh pui hi an nei ngai lo hle.Mithi ruang kawng zawh pui hi Muslim ho zingah leh ram ah a tam em em a, Jammu and Kashmir, Palestine, Indonesia, leh Middle East velah khuan an uar thei hle a ni.Kristian chuan mithi chu fel fai taka tawngtaina nena vui leh thlah hi thil tha ber niin a lang.
Rawng taka tual thattu ho hi an dem awm a, tual that tu te pawh an phu tawk ang hremna pek ngei tur pawh a ni ang.Khawlaia mithi ruang kawng zawh pui hi a hunlai a awm a ni thei e, thil tih awm ber pawh a ni thei bawk ang.Mahse thil tha ber leh fin thlak ber a ni em tih kha ngaihtuah tham a tling a ni.Vai ho in Mizo pawi an khawih emaw a nihin kan thalai thisen lum leh thinrim chuan an hmuh hmuh vai an khawih ta thin a ni.Vawikhat chu vai kan sawisa lai leh kut thlak lai Local channel ah kan hmu a nih kha, an sawisa lai leh an hnathawhna hmun atanga an paih thla lai te pawh, damdawiin a hliam tuar kal te pawh TV atangin kan hmu a nih kha.A nih leh vai an nih vang ngawt khan kha tia sawisak a thiang reng em?.Mihring an nihna ang in Human Rights an nei ve a, chhantu an awm em?.Human Rights pawl an awm a, khang ho khan an thla vang an hauh sak em?.Kum 2002 khan Ayodhya a kal Hindu sakhaw be ho chuanna rel chu Godhra ah Muslim firfiak ten an hal a, Hindu nu nau ho an thih phah nasa hle a nih kha, Hindu ho thinrim chuan Muslim ho an suam ta ngawt a, India ram khawvelin a dem a, National Human Rights Commission pawh a in rawlh nghal reng a,tun thlengin Best Backery Case phei chu chinfel lohin a la awm ta reng a nih hi.Human rights lama hma la tu te hian Hindu an ni emaw, Muslim an ni emaw, Mizo an ni emaw, vai an ni emaw, ang khat vekin a en tur a ni ang. Mihring dikna leh chanvo humhalh nana hma latu te an awm si chuan khang mipui sawisak vai hlawhfa ho te thlavang hauhtu tura kan lo rin kha khawnge an awm tak?.Thil thenkhata ‘ active’ viau si leh hma la chak tak si, leh lama ngawih chuh tlat Human Right pawl kan nei a nih chuan thil fel ber a ni lo ang.
Tun laiin Human Rights lama pawl tha leh chak tak kan nei a, mahse khang vai in hlawhfa ho sawisak te kha a hming talin an thlavang an hauh sak em?.An in enkawl ve na tur zangna dawmna te an phut sak em?. Thil tih reng reng chuan a rual khai zawk a kan chet hi a pawimawh em em a ni tih hi mitinin kan hriat a tha hle.Human Rights a nih ang ngeiin mi tupawh dikna leh chanvo humhalh sak hi hetiang lama sulsu tuten an tih tur niin a lang.Vai in hlawhfa an nih avang ngawt khan kha sawisak an nihna kha an ‘right’ a ni bik lo a, Mizo, vai, Muslim, Juda zawng zawng te pawhin dikna leh chanvo humhalh theihna kan nei a, Human Rights lamin min tanpui thei bawk.Chuvangin Mizoram a nih avanga Mizo te ‘right’ chauh hum sak lova, ‘Human’ a nih ang ngei a mi zawng zawng dikna leh chanvo kan humhalh sak a ngai a ni.Vai chhe ho hi duhsak tur phei zawng ka ti lo, mahse mihring an nihna ang a kan en ve a tul a,kan ramah hian heng a chek hnawk ho phei hi chu lo lut lo tawp phei se chu kan buai kan buai lo tur a ni a, mahse khawvel a ni miau a, dan theih leh dan sen ni hek lo le.
Mohammada ai chuan Krista: Ni e, Mohammada tih hming hi chu a hlauhawm hmel tlat alawm.Mohammad Al Fayed te pawh kan hria ang a, a ni erawh chu a hlauhawm hmel lem lo e.Mi hausa tawn taw a ni bawk nen.India rama i awm chhung chuan eng hming pawh Sonia, Atal, Chingi, Khaukhanthang, James, Donny, Rita tih pawh pu la, chi vang emaw, hnam vang emaw, hming vangin emaw in thliar hran hi a khap tlat a ni kha.Kan rama pawl pakhat emaw chuan Mohammad tih hming pu reng reng chu ILP pek tawh lo ni se tiin an duh thu an sam a, Mohammad tih hming avanga mi te hmuh theih ang zawng zawng kan chan a ngaih chuan kan ram chu democracy rorelna a ni thei lo ta hrim hrim a ni.Tualthah, ruk ruk leh pawikhawihna lian leh te hi khawvel pian ken a ni a,Mohammad tih hming hlirin a tual an thah bik chu ka ring thei lo a ni.A nih leh kan rama damdawi leh ruih hlo tawlh lut ru ho zingah hian Mohammad tih hming pu chu an tlem hle ang a, kan hnam hming ang deuh ni si, ni chiah si lo te an tam ber ang.Hming avang ringawta ILP in pek loh chu thil dik lo hul hual a ni ang a, chu ai chuan a pe chhuaktu te fimkhur tura kan chah ngun leh a sponsor tute kan fimkhur a ngai zawk daih a ni.
Hang ‘em all !!!: Hmeichhe pawl pakhat chuan kan Mizo nula pawisawi lo rawng taka that tute khaihlum hial tlak an ni an ti leh mauh mai. An thu a rum hle mai.Human Rights lama pawl kan neih te hian in khaihlum hi eng angin nge an ngaih ve aw?.In khaihlum tawng mai hi tunlai ram hrang hrang hian an bansan tan tawh a.Khaihlum ai chuan misualin ‘chance’a neih beiseiin siam that hna an thawk zawk tawh thin.India ram leh Third World ram angah te chuan misual khaihlum hi a la awm a, ram chang kang ber America ngeiah te pawh misual tih hlum tlaka an ngaih te chu an ti hlum mai thin.Khaihlum erawh chu tunlai chhanah a ‘humane’ lo em mai tiin America ah chuana chiu in an chiu hlum thin.Misual tih hlum leh khaihlum hrim hrim hi European Union ah chuan an duh tawh lo a, he Union a tel tur chuan ram economy dinhmunte, secular ram a ni em tih te, an human rights record te an en phawt a, an thlang chauh thin.Turkey pawh tun thlenga a tel theih loh na chhan pakhat chu misual tih hlum an la chin vang a ni ber.Chuvangin in khaihlum hian thil tih sual tawh kha a siam tha leh em tih hi ngun taka kan ngaihtuah a ngai zawk a ni.Pawl hming leh mimal hminga thil kan tih reng reng hian ngun tak leh thui tak thlir chunga kan tih hi a tha hle a, lehlama vung tak si, leh lama chau tak si a kan awm leh si chuan mitin huap zo kan ni thei lo ang.Chuvangin kan thil tih tur kha ngun taka thlir hmasak hi a tha hle ang.

V. Lalengmawia
Champhai Vengthlang.
(Published in Aizawl Thupuan on 9th and 10th Aug 2004