TOTAL BANDH NEIH HI A THA BER EM?

Kan ram chu democracy anih avangin mitinin kan chanvo leh dikna humhalh theihna te, sawrkar sawichhiat theihna te hi kan nei a ni.Sawrkarin mipui duh loh zawng engemaw dan a siam anih chuan political party te, zirlai pawl leh tlawmngai pawl ten chu dan siam chu sawiselin, chanchinbu lam pawhin nasa takin an sawisel thin.Sawrkar policy kan sawisel vang ngawt khan sawrkarin min hrem kher lo.Hei tak hi kan vanneihna leh democracy ram kan nihna chu a ni.Tichuan Total Bandh thleng kan huaihawt ta thin a ni.Tunlaiin Bharat Bandh tihte, Mizoram Bandh tih te kan hre lar tawh hle.Bandh a awm reng rng hian sawrkar hnathawkte hian chawlh emaw ti ang hrimin kal loh kan tum nghal ngawt thin bawk.Kal luih tum pawh kan am thin lo.Chuvangin Total bandh neih hi thil tha ber a ni em tih hi chhut ngun a ngai hle a ni.

Bandh neih hi thil tha tak sawrkar duh loh entirna a tan pawh a tangkai hle a ni thei.Amaherawh chu bandh avang hian kan nitin nunphung a khaihlak nasa em em a ni.A bik takin mirethei, nitin a eichawp zawnga chhuak leh in hlawhfa te leh chawhmeh zuarte hi a nghawng nas zual a ni.Chawhmeh zuar ho phei chu an chawhmeh zawrhte hi zawrh chhuah tlak loh vin a chhe mai thin.Mi hausa leh neinung zawk te tan chuan bandh hi chawlh hahdamna ni tha tak niin a lang zawk.

Total Bandh hi a thuhrimah neih deuh chhen emaw, thawk a phit a bandh tih ngawt pawh hi a tha ber lo.Communist party rorelna West Bengal leh Kerala tih ang reng khuan bandh hi an uar em em mai a, a chhan chu an state ah khuan Trade Union politics a nasat em vang a ni.Heng Trade Union ho hi political party tan lam nei fir fer an ni vek a, sawrkarin engemaw an duh loh zawng dan a siam reng reng in heng trade union ho hian bandh an huaihawt nghal ngawt zel a ni.Trade union hi nawrtu lian tak a ni reng a, nasa taka a han chet tawh hi chuan sawtkar pawh hi a tawlh kir leh duai duai thin.Amaherawh chu heng bandh uarna hmunah hian industry ho hian an tuar nasa em em a,an tlakchhiat phah fo thin a ni.Foreign company tam tak hman laia Calcutta a hmun nei thin te pawhin an company in a tawrh thin avangin an office hi Bangalore, Hyderabad leh Chennei lamah an sawn phah fo thin a ni.Tichuan West Bengal sawrkar chuanrevenue leh foreign direct investment ah nasa takin a hloh ta thin a ni.

Ram pum huap anga bandh neih hi West Bengal, Bihar ahte hian a tam hrim hrim a, an dinhmun pawh state dang ai chuan a hniam hle reng a ni.Chuvangin bandh neih fo hi kan changkanna daltu a ni tih hria a, kan nitin nun phungte ,kut hnathawkte leh zirlai naupang te a nghawng a ni.Total Bandh pui pui nei lovin a aia kan nunphung ti buai lo tur,tangkai tak tho si,chawnghei te,poster emaw banner tarte emaw hi uar ta zawk ila, mirethei zawkte leh kan kut hnathawktu te kan ti buai lo zawk ngei ang.

V.Lalengmawia
Venghnuai Sihpui Veng
Published in Vanglaini & Aizawl Post on 14th July 2004