AMERICA INTHLAN DAN AIIN INDIA CHANGKANG ZAWK

Democracy ram chu in thlang ram kan ni a, America pawh democracy a nih avangin inthlang ram, keini India ram ang bawka in thlang ram a ni ve a ni.Inthlan hi thil hautak zet mai a ni a, sawrkarin a full term a hman zawh loh a inthlan a ngaih chang te hian mithiamte rilru hi a lo hah hle thin , a chhan chu inthlanah hian sum tamtak sen a ngai a, ram economy dinhmun a chhiat phah fo thin a ni.America hi thil engkima changkang zawk leh tha ber zawk emaw kan lo ti palh ang e, inthlan chungchangah erawh chuan America aiin India hi kan changkang zawk tlat asin!!.

Pakhatnaah chuan India ramah chuan inthlanna lama thuneitu sang ber Election Commission of India kan nei a, Constitution of India in a siam a ni leh nghal.Article 234 in a sawi dan chuan heng Parliament inthlante,state inthlante, President leh Vice President thlan chungchang hi Election Commission kut ah vek dah a ni.Tin, hei mai bakah hian dan fel tak Representation of Peoples Act kan ramah chuan kan la nei cheu bawk.He dan hian candidate zawng zawng a phuar tlat a ni.America ah ve thung chuan state tin khuan election commission an nei vek a, inthlan chungchanga dan pawh state tin te khuan an nei hrang fir fer a ni.

Pahnihnaah chuan kan ramah hian inthlan naah costiteuncy lian leh te ah pawh returning officer pakhat chiah kan nei a, ballot paper pawh pakhat chiah, chupawh a size leh thil engkim in ang kan hmang bawk.America ah erawh chuan ballot paper hi a hrang nuai a, state pakhat chhung a district hrang hrang te pawhin a chang chuan ballot paper hrang hlak an nei thin.

Pathumnaah chuan kan ramah chuan electronic voting machine hman vek tur tih a nih chuan kan hmang vek mai a, America ah erawh chuan voting machine hmang an awm a, a thenin ballot paper an la hmang lawi si nen.Hmun thenkhaah chuan an voting machine hman hi a upa tawh em em a, kum za aia upate pawh an ni thin.Hmun then khat ve thungah erawh chuan a tunlai thei ang ber, kan voting machine aia changkang a ni lawi si.Chuvangin ‘uniformity’-in an tlanna awm lo reng reng a ni.

Palina, India ramah chuan civil service officer ho hian election an buaipui thin a, heng officer ho hi politics a in hnamhnawih phal a ni lo reng reng a ni.America ramah erawh chuan election official-te hian party tan lam ual au takin an ti lang thin a ni.Kan hriat theuh angin kum 2000 USA inthlan khan Florida state a Secretary of State Kathrine Harris kha ual au taka Republican George W.Bush tantu tia puh a nih kha.Mi tam tak chuan Al Gore tlin loh chhanah pawh he nu hi an puh a nih kha.Chuvangin kan ram hian inthlanna lama mithiam tak tak kan nei a ni tih hi hre ve thin ang u.

V.Lalengmawia
Venghnuai Sihpui Veng